.
കൊട്ടാരക്കര : കേരളത്തിലെ ജനങ്ങൾ കാലഘട്ടത്തിന്റെ ആവശ്യകത മനസിലാക്കി പ്രവർത്തിക്കുന്നത് പ്രശംസനീയമാണന്ന് നിയുക്ത എം എൽ എ കെ.എൻ.ബാലഗോപാൽ പറഞ്ഞു. കെയർ കൊട്ടാരക്കര പദ്ധതിയിലൂടെ കോവിഡ് പ്രതിരോധ പ്രവർത്തനങ്ങൾക്കായി നിയോജക മണ്ഡലത്തിലെ മുഴുവൻ വാർഡുകളിലും നൽകുന്ന ആരോഗ്യ സുരക്ഷാ ഉപകരണങ്ങളുടെ മണ്ഡലം തല ഉദ്ഘാടനം ഉമ്മന്നൂർ ഗ്രാമപഞ്ചായത്തിൽ നിർവ്വഹിക്കുകയായിരുന്നു ബാലഗോപാൽ. ഈ മഹാമാരിയുടെ അതിവ്യാപനം തടയുന്നതിന് വേണ്ടിയുള്ള നമ്മുടെ പ്രവർത്തനങ്ങൾക്ക് മണ്ഡലത്തിലെ ജനങ്ങളുടെ വലിയ സഹായമാണ് ലഭിച്ച് കൊണ്ടിരിക്കുന്നത്. ഒരു വാർഡിൽ കുറഞ്ഞത് ഒരു വാഹനം എന്നതാണ് നമ്മുടെ ലക്ഷ്യം. കോ വിഡ് രോഗികളെ പരിശോധനക്ക് വിധേയമാക്കാനും മരുന്നുകളും മറ്റും വീടുകളിൽ എത്തിക്കുവാനും വേണ്ടിയാണിത്. വെഹിക്കിൾ ചലഞ്ചിലൂടെ ലഭിച്ചതും ഉമ്മന്നൂർ പഞ്ചായത്തിന് നൽകുന്നതുമായ വാഹനങ്ങളുടെ ലിസ്റ്റും പൾസ് ഓക്സിമീറ്ററുകളും പ്രസിഡൻറ് അമ്പിളി ശിവൻ ബാലഗോപാലിൽ നിന്നും ഏറ്റുവാങ്ങി. പഞ്ചായത്തിലെ ആശാ വർക്കർമാർക്കുള്ള പി പി ഇ കിറ്റിന്റെ വിതരണവും നടത്തി. ചടങ്ങിൽ ജില്ലാ പഞ്ചായത്ത് അംഗം ജയശ്രീ വാസുദേവൻ , ഗ്രാമ പഞ്ചായത്ത് വൈസ് പ്രസിഡന്റ് പി.വി.അലക്സാണ്ടർ , ബ്ലോക്ക് പഞ്ചായത്ത് അംഗങ്ങളായ ബെൻസി ടീച്ചർ , സിനി ജോസ് , സി പി ഐ എം ഏരിയാ സെക്രട്ടറി പി.കെ.ജോൺസൺ , ലോക്കൽ കമ്മിറ്റി സെക്രട്ടറിമാരായ കെ.പ്രതാപകുമാർ, പി.ജെ.മുരളീധരനുണ്ണിത്താൻ സി.പി.ഐ മണ്ഡലം കമ്മിറ്റി അംഗം എ.നവാസ് , പഞ്ചായത്ത് മെമ്പർമാർ , സെക്രട്ടറി സി.അലക്സ് എന്നിവർ പങ്കെടുത്തു.