ന്യൂഡല്‍ഹി: ‘നിവര്‍’ ചുഴലിക്കാറ്റ് ആന്ധ്രാ പ്രദേശ്, തമിഴ് നാട്, പുതുച്ചേരി തീരത്തേക്ക് നീങ്ങുകയാണെന്ന് കാലാവസ്ഥാ നിരീക്ഷണ കേന്ദ്രം. ബുധനാഴ്ച ഉച്ചക്കുശേഷം 60 – 120 കിലോമീറ്റര്‍ വേഗതയില്‍ പുതുച്ചേരിയിലെ കാരക്കലിനും തമിഴ്നാട്ടിലെ മഹാബലിപുരത്തിനും ഇടയില്‍ ‘നിവര്‍’ ആഞ്ഞടിക്കുമെന്നാണ് റിപ്പോര്‍ട്ട്.
ചെന്നൈ, വില്ലുപുരം, കടലൂര്‍, പുതുച്ചേരി എന്നിവിടങ്ങളില്‍ ശക്തമായ മഴക്കും സാധ്യതയുണ്ട്. നിലവില്‍ 40-50 കിലോമീറ്റര്‍ വരെ വേഗതയിലാണ് നീങ്ങുന്നത്. ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദം ചുഴലിക്കാറ്റായി മാറുകയായിരുന്നു.
ശക്തിയേറിയ കാറ്റ് കാര്‍ഷിക വിളകള്‍ നശിപ്പിക്കുമെന്നതിനാല്‍, ആന്ധ്ര പ്രദേശിെന്‍റ തെക്കന്‍ തീരദേശത്തും റായലസീമയിലും കര്‍ഷകര്‍ കാലതാമസമില്ലാതെ വിളവെടുക്കണമെന്ന് നിര്‍ദ്ദേശിച്ചിട്ടുണ്ട്.
തമിഴ്നാട്ടിലെ ചെന്നൈ, ചെങ്കല്‍പ്പട്ട്, കാഞ്ചിപുരം, മയിലാടുതുറൈ, വിഴുപ്പുറം, കടലൂര്‍ എന്നീ ജില്ലകളിലും പുതുച്ചേരിയിലും ചുഴിലിക്കാറ്റ് നാശം വിതക്കാനാണ് സാധ്യത. ഇതേതുടര്‍ന്ന് തമിഴ്നാട് മുഖ്യമന്ത്രി എടപ്പാടി പളനിസാമി മന്ത്രിമാരുടെയും ഉന്നത ഉദ്യോഗസ്ഥരുടെയും യോഗം ചേര്‍ന്നു. തീരപ്രദേശങ്ങളില്‍നിന്ന് ജനങ്ങളെ മാറ്റിപാര്‍പ്പിക്കുന്നുണ്ട്.