കാസര്‍ഗോഡ് : സംസ്ഥാനത്ത് ഒരു കോവിഡ് മരണം കൂടി. കര്‍ണാടക ഹുബ്ലിയില്‍ നിന്നു വരുന്നതിനിടെ കാസര്‍ഗോഡ് വച്ചു മരിച്ച മൊഗ്രാല്‍ പുത്തൂര്‍ സ്വദേശിക്ക് കോവിഡ് സ്ഥിരീകരിച്ചു. വിദഗ്‌ധ പരിശോധനയ്‌ക്ക് ശേഷമാണ് ഇയാളുടെ മരണം കോവിഡ് ബാധിച്ചാണെന്ന് വ്യക്തമായത്.
മൊഗ്രാല്‍ പുത്തൂര്‍ കോട്ടക്കുന്നിലെ ബി.ആര്‍.അബ്‍ദുള്‍ റഹ്‍മാനാണ് (48 വയസ്) മരിച്ചത്. അബ്‍ദുള്‍ റഹ്‍മാന് രോഗമുണ്ടായത് കര്‍ണാടകയില്‍ നിന്നെന്ന് ആരോഗ്യവകുപ്പ് അറിയിച്ചു. ഇദ്ദേഹത്തിന്റെ ട്രുനാറ്റ് ഫലം നേരത്തെ പോസിറ്റീവ് ആയിരുന്നു. എന്നാല്‍, വിദഗ്‌ധ പരിശോധന കൂടി കഴിഞ്ഞപ്പോഴാണ് മരിച്ചയാള്‍ക്ക് കോവിഡ് ഉണ്ടെന്ന് ഔദ്യോഗികമായി സ്ഥിരീകരിച്ചത്. ഇയാളുടെ ബന്ധുക്കള്‍ നിരീക്ഷണത്തിലാണ്. ഇയാളെ ചികിത്സിച്ച കാസര്‍ഗോഡ് ജനറല്‍ ആശുപത്രിയിലെ നാല് ജീവനക്കാരും ക്വാറന്റെെനിലാണ്. ആശുപത്രിയിലെ അത്യാഹിത വിഭാഗം അണുവിമുക്തമാക്കി. വിദഗ്‌ധ പരിശോധനയ്‌ക്കായി സാംപിള്‍ അയച്ചത് പെരിയയിലെ ലാബിലേക്കാണ്.സുള്ളിയിലെ വ്യാപാരിയായ ഇദ്ദേഹം കഴിഞ്ഞ ദിവസമാണ് ആംബുലന്‍സ് വഴി അതിര്‍ത്തിയായ തലപ്പാടിയിലെത്തിയത്. കടുത്ത പനിയെ തുടര്‍ന്നാണ് ഇയാള്‍ നാട്ടിലേക്ക് പോന്നത്. തലപ്പാടിയിലെത്തിയ ഇയാളെ രണ്ട് കുടുംബാംഗങ്ങള്‍ ചേര്‍ന്ന് കാറില്‍ കാസര്‍ഗോഡ് ജനറല്‍ ആശുപത്രിയില്‍ എത്തിക്കുകയായിരുന്നു. അപ്പോഴേക്കും ആരോഗ്യസ്ഥിതി മോശമായി. മറ്റ് ആരോഗ്യപ്രശ്‌നങ്ങളൊന്നും ഇദ്ദേഹത്തിനുണ്ടായിരുന്നില്ലെന്നാണ് റിപ്പോര്‍ട്ട്.
