കോവിഡിനെ തോല്പിച്ച് രണ്ടു ഘട്ടങ്ങളായി നടത്തിയ എസ്.എസ്.എൽ.സി. പരീക്ഷയിൽ തൃത്താല പറക്കുളം ജി.എം.ആർ.എസിന് നൂറുശതമാനം വിജയം.
പതിനൊന്നാം വർഷമാണ് തുടർച്ചയായി വിദ്യാലയം നൂറ് ശതമാനം വിജയം നേടുന്നത്. ഇതിൽ ഏഴ് വിദ്യാർഥികൾ
എല്ലാ വിഷയത്തിലും എ.പ്ലസും നേടി.
15 വിദ്യാർഥികൾ ഒമ്പത് എ.പ്ലസ് നേടി. കേരളത്തിലെ വിവിധ ജില്ലകളിൽനിന്നുള്ള പട്ടികജാതി, പട്ടികവർഗ വിദ്യാർഥികൾ പഠിക്കുന്ന സ്കൂളാണ് പറക്കുളം മോഡൽ റസിഡൻഷ്യൽ സ്കൂൾ.
ലോക്ക്ഡൗണിനെ തുടർന്ന് പരീക്ഷ മുടങ്ങിയതിനാൽ വിദ്യാർഥികളെല്ലാം ഹോസ്റ്റലിൽ നിന്ന് വീടുകളിലേക്ക് പോയിരുന്നു. പിന്നീട് അവസാന മൂന്ന് പരീക്ഷയെഴുതാൻവേണ്ടി വീടുകളിൽനിന്ന് എത്തുകയായിരുന്നു. പ്രധാനാധ്യാപകൻ
ടി.അബ്ദുൾറഹ്മാന്റെ നേതൃത്വത്തിലുള്ള ചിട്ടയായ പഠനരീതികളും അധ്യാപകരും പി.ടി.എ.യും ചേർന്നുള്ള ശക്തമായ പിന്തുണയുമാണ് കുട്ടികളുടെ വിജയത്തിന് കാരണമായത്. തൃത്താല ഉപജില്ലയിൽ ചാലിശ്ശേരി, കൂടല്ലൂർ, നാഗലശ്ശേരി സർക്കാർ വിദ്യാലയങ്ങളും, പെരിങ്ങോട് എയ്ഡഡ് ഹൈസ്കൂളും, മുടവനൂർ ഐ.ഇ.എസ് അൺഎയ്ഡഡ് ഹൈസ്കൂളും നൂറ് ശതമാനം വിജയം നേടിയിട്ടുണ്ട്.