കൊച്ചി : ലോക്ക് ഡൗണിനു ശേഷം അമിത ബില്‍ ഈടാക്കിയെന്ന പരാതിയില്‍ കെഎസ്‌ഇബി വിശദീകരണം നല്‍കണമെന്ന് ഹൈക്കോടതി. മുവാറ്റുപുഴ സ്വദേശി നല്‍കിയ ഹര്‍ജിയിലാണ് ഹൈക്കോടതി നടപടി.
ലോക്ക് ഡൗണിനു ശേഷം ഉപഭോക്താക്കള്‍ക്കു ബില്‍ നല്‍കിയതില്‍ അശാസ്ത്രീയതയുണ്ടെന്ന് ആരോപിച്ചാണ് ഹര്‍ജി നല്‍കിയിരിക്കുന്നത്. ഹര്‍ജി മറ്റന്നാള്‍ പരിഗണിക്കും.
ലോക്ക് ഡൗണ്‍ കാലത്ത് മുടങ്ങിയ ബില്ലിങ് പുനരാരംഭിച്ചപ്പോള്‍ അമിത ചാര്‍ജ് ഈടാക്കിയതായി വ്യാപകമായി പരാതി ഉയര്‍ന്നിരുന്നു. പിന്നീട് ഇതില്‍ വിശദീകരണവുമായി കെഎസ്‌ഇബി രംഗത്തുവന്നു. വൈദ്യുതി ഉപഭോക്താക്കളില്‍ നിന്ന് അധികതുക ഈടാക്കിയിട്ടില്ലെന്നാണ് കെഎസ്‌ഇബി ചെയര്‍മാന്‍ എന്‍ എസ് പിള്ള അറിയിച്ചത്.ലോക്ക്ഡൗണ്‍ കാലത്ത് വൈദ്യുതി ഉപഭോഗം നന്നായി കൂടിയിട്ടുണ്ട്. മീറ്ററില്‍ രേഖപ്പെടുത്തിയ ഉപഭോഗത്തിന്റെ അടിസ്ഥാനത്തില്‍ മാത്രമാണ് ബില്ലെന്നും അദ്ദേഹം പറഞ്ഞു.