രാജ്യത്ത് കോവിഡ് മരണം 7000 കടന്നു. 24 മണിക്കൂറിനിടെ 9983 പേര്‍ക്ക് പുതുതായി കോവിഡ് സ്ഥിരീകരിച്ചു. ഇതോടെ രാജ്യത്ത് കോവിഡ് ബാധിതരുടെ എണ്ണം രണ്ടര ലക്ഷം കടന്നു. 206 പേരാണ് 24 മണിക്കൂറിനിടെ കോവിഡ് ബാധിച്ച്‌ മരിച്ചത്. രോഗികളുടെ എണ്ണം 85,000 കടന്നതോടെ മഹാരാഷ്ട്ര ചൈനയെ മറികടന്നു.
രാജ്യത്തെ കോവിഡ് രോഗികളുടെ എണ്ണം ക്രമാതീതമായി വര്‍ദ്ധിക്കുകയാണ്. മഹാരാഷ്ട്ര, തമിഴ്നാട്, ഗുജറാത്ത്, ഡല്‍ഹി എന്നീ നാല് സംസ്ഥാനങ്ങളില്‍ സ്ഥിതി വളരെ ഗുരുതരമാണ്. മഹാരാഷ്ട്രയില്‍ ഞായറാഴ്ച മാത്രം മൂവായിരത്തിലധികം കേസുകളും 91 മരണവും റിപ്പോര്‍ട്ട് ചെയ്തു. സംസ്ഥാനത്തെ രോഗികളുടെ എണ്ണം 85,975 ആയി. മരിച്ചത് മൂവായിരത്തിലധികം പേര്‍. ഇതോടെ ചൈനയിലെ രോഗികളുടെ എണ്ണത്തെ മഹാരാഷ്ട്ര മറികടന്നു. മുംബൈയിലെ ധാരാവിയില്‍ 13 പുതിയ കോവിഡ് കേസുകള്‍. ആകെ കേസുകളുടെ എണ്ണം രണ്ടായിരത്തോടടുക്കുന്നു.
ഡല്‍ഹിയില്‍ കോവിഡ് ബാധിച്ചവര്‍ മുപ്പതിനായിരത്തിനടുത്തെത്തി. കഴിഞ്ഞ ദിവസം മാത്രം 1282 പുതിയ കേസുകള്‍ കണ്ടെത്തി. തലസ്ഥാനത്ത് മരിച്ചവരുടെ എണ്ണം 812 ആണ്. ജമ്മുകശ്മീരില്‍ കഴിഞ്ഞ 24 മണിക്കൂറിനുള്ളില്‍ 620 പേര്‍ക്ക് കോവിഡ് സ്ഥിരീകരിച്ചു. ഉത്തര്‍പ്രദേശില്‍ 433 ഉം രാജസ്ഥാനില്‍ 262 ഉം ഹരിയാനയില്‍ 496 ഉം പുതിയ കേസുകളുണ്ട്. പശ്ചിമബംഗാളില്‍ ഇന്നലെ 449 പുതിയ കേസുകളും13 മരണവും റിപ്പോര്‍ട്ട് ചെയ്തു.ബീഹാറില്‍ 141 പഞ്ചാബില്‍ 93 കോവിഡ് കേസുകള്‍ കൂടി സ്ഥിരീകരിച്ചു.