കൊച്ചി : മൂവാറ്റുപുഴയില്‍ വിവിധ ഭാഷാ തൊഴിലാളികളുടെ താമസ സ്ഥലത്തേക്ക് കാര്‍ പാഞ്ഞുകയറി. അപകടത്തില്‍ യുവ നടന്‍ ഉള്‍പ്പെടെ മൂന്ന് പേര്‍ മരിച്ചു. നടന്‍ ബേസില്‍ ജോര്‍ജ്, അശ്വിന്‍ ജോയ്, നിതിന്‍ എന്നിവരാണ് മരിച്ചത്. മൂന്ന് പേരും വാളകം സ്വദേശികളാണ്.
അപകടത്തില്‍ അഞ്ച് പേര്‍ക്ക് പരിക്കേറ്റിട്ടുണ്ട്. കാറില്‍ ഉണ്ടായിരുന്ന രണ്ട് പേര്‍ക്കും വിവിധ ഭാഷാ തൊഴിലാളികളായ മൂന്ന് പേര്‍ക്കുമാണ് പരിക്കേറ്റത്. ഇവരെ കോലഞ്ചേരിയിലെ സ്വകാര്യ ആശുപത്രിയിലേക്ക് മാറ്റി. ഒരാളുടെ നില ഗുരുതരമാണ്.
പൂവള്ളിയും കുഞ്ഞാടും എന്ന ചിത്രത്തിലെ നായക വേഷത്തിലൂടെയാണ് ബേസില്‍ സിനിമാ രംഗത്ത് എത്തിയത്. വാളകം നടപ്പറമ്പേല്‍ ജോര്‍ജ്-സിജി ദമ്പതികളുടെ മകനാണ് ബേസില്‍.